Feeds:
Posts
Comments

Archive for March, 2010


قال لي الصوت العلوي ..

أن احسم أمرك .. جاوز خوفك ..

ألقيتُ بكل سني العمر الماضي خلفي ..  وتبسمت

قبلت ما بين عينيها  – البساتين -.. و عزمت ..

ألقيت برأسي فوق جدار الأمل العابس .. خاطبني .. إنهض .. ما شئتَ يكونُ إن أنت تركت هروبك خلفك !

Read Full Post »

ــر

يامّا ولا تخافي،  أصل الكلام يفضل كلام والشعر مبيسجنش ..

لو حتى نار صافي ، قالوا اللي مكتوب في الكتب لا يمر على عين العوام وان مر ميلونش ..

الأحمر الخافي ، يبين إذا قام ابن الكرام يصرخ يقول الحق يهز وش الأرض هزة مبتسكنش ..

وأنا أصلي ماتلونش ..

وشي أنا من لون طمي النيل أسمر ومتعافي .. تلمسني يد البنية الحورا تسحرني أذوب أنا من عمق مصريتها ماتكونش ..

وأدوب في عشق البين بين مصر ف عينيها مزرعة بساتين زتون وإيديها من عمق الزلع تحلبلي مش ..

حالي ماهو ممرر ولا طعمه متغير ..

بطعم خير صافي

وتبسملي وأبسم ، “عيني” لا تخافي

،لأجل عيونك الحورا وعينها يا مصر ماستسلمش ..

Read Full Post »

كتب  أحمد بدوي ..


لو خمسة تلاف واحد بس نزلوا الشارع يوم 6 أبريل الحكومة مش حتقدر تمنعهم
مش حتقدر تخبيهم عن الاعلام و جرايدها الصفرا مش حتعرف تتجاهلهم
مش حتقدر تمسح من عقولهم العطش للحرية و الديمقراطية و الكرامة الانسانية
المسألة مش مسألة أسعار تنخفض كام يوم و ينضحك علينا تانى …
المسألة أن المصريين لازم يتحركوا عشان مصر تبقى حرة و ترجع أم الدنيا تانى
دى مش كدبة أبريل المرة دى …

تجمع الشعب المصرى و الشباب المصرى مش هين و مش سهل و مش حيعدى بسهولة
ممكن يحبسوا مائة ولا متين … بس مش حيقدروا يحبسوا ألف ولا ألفين ولا عشرة تلاف
يا مصر جه الوقت اللى تقومى فيه من النوم ……
الناس يمكن حيقوموا عشان الأسعار بس مش حيقفوا عندها و حيطالبوا بأكتر و أكتر لحد ما العصابة كلها تخاف و تهرب و ترجع بلدنا لينا
الاعتصام مش فى البيوت ولا على النت …
لازم نشوف بعض و نمسك ايدين بعض و نساعد بعض و نسند بعض ..
. لازم كلنا نقف مع بعض ضد حاكم مستبد غشيم مش بيعامل شعبه غير بالارهاب و الكدب
لازم كلنا نبقى عقول و ايادى و ارادة متجمعة فى سبيل الحرية
لازم تعرف العصابة ان المصريين مش عبيد ولا أتباع و ان لكل ظالم نهاية بقى
فوقى يا مصر و اوعى تنامى تانى أبدا … جه وقت الحساب يا أغاوات
شاركوا فى الاضراب عشان مستقبلنا … عشان حريتنا … عشان مصرنا

28 مارس 2008

……

أحمد بدوي . أتشرف بمتابعتي له .. ، وتأكيداً له قول مولانا زين العابدين فؤاد

مهما يزيد الفجر بالسجانة مين اللي يقدر ساعة يحبس مصر ..

Read Full Post »

بيني وبينك مَر طريق .. بيني وبينك مُر طريق ..


يكتب اسمي بلون الدم ويصرخ فيّا قوم يا رفيق ..


أنام على كتفك يمكن لوني الذابل فيكي يرد عليكي يواسي دمعة سريت فوق خد النعسانة ف باب الخلق أوفي طريقها بينا وبين البلد الأفرنجي تشد غريق ..


وكتاب الحق أنا قلتله لأ .. مش ناوي أسكت بين الآه واللأ ..


اتشدت مني الآهه لقيتني أرق ..


وصبحت بعد وساخة عمري الأول قلب بريء !!

Read Full Post »

مـ

الفرح جاي م الباب بيطرد الأحزان ..

شباك نضالنا اتفتح خرج البعيد متهان ..

اتلونت خيبته من كل لون ألوان ..

ماهو ده طبع الخسيس لمّا الحقيقة تبان !

Read Full Post »


حالة من التوتر المشوب بالقلق والحذر .. رغبة في التراجع عن العمل العام والخدمة الوطنية !



حالة إحباط وخوف وهلع .. تجتاح كل شباب الناشطين ..



مش ده اللي انتوا كنتم عاوزينه ..

..

.

مساكين


محصلش ومش هيحصل ..


فاكرين فعلاً .. لما ترهبوا واحد أو اتنين ، أو تحاولوا تخوفوهم حتى .. ” بغض النظر عن إن قلوبهم صخر لأن ده طبع ولاد مصر ” الباقي هيتراجع وينام في بيته ..


على فكرة إحنا نفس الناس اللي كانوا موجودين على كوبري عباس سنة 1946 وبيتضرب عليهم رصاص حيّ ..


انتوا متعرفوش عبدالحكم الجراحي أكيد .. أكيد مش عارفينه .. عشان متخيلين إن شباب مصر ممكن يخاف ..


طيب اديني عقلك كده .. متخيل إننا هنقول .. طب واحنا هنقدر نعمل إيه  لما يلمونا واحد واحد.. لأ نعمل كتير .. خطوة على طريق الحرية .. ممهدة الطريق للأحرار اللي جايين بعدنا .. بعرق ودم

المصري روح وقلب قبل ما يكون جسد فاني .. تسجن الجسد والروح بتسجن السجان


نسيتوا أمل دنقل الله يرحمه بيقول إيه .. ” أو يمكن متعرفوش ” ..

“وغدًا..

سوف يولد من يلبس الدرع كاملةً،

يوقد النار شاملةً،

يطلب الثأرَ،

يستولد الحقَّ، من أَضْلُع المستحيل .. “

غداً جاي ابني لو منجحتش ” بعيد الشر عننا  ” يكمل على خطاويّا


مش هنيأس .. ومعندناش استعداد نرضى بأمان مزيف ..  ومعندناش مانع نبقى طوبة ف بيت الحرية الكبير ” مصر ” ..


وهنفضل شوكة في حلق كل فاسد ومستبد ..


يسقط يسقط حكم العسكر ..

* تدوينة مهداة إلى مها الخضراوي ..

Read Full Post »


ما أظنش في وقت أنسب من ده لاننا نعمل حاجة بجد


من غير خوف .. من غير قلق


جاتلنا زي ما جت سنة 19 وخرج المصريين يرفعوا العلم


زي ما جت سنة 35 و 46 وانتفض الشباب و غنينا لعبد الحكيم الجراحي


زي ما صرخوا سنة 68 و 69 و 72 وغنالهم أمل دنقل


وانتصرنا سنة 73


وخرج المصريين ينادوا بالديمقراطية سنة 77 و 78 و 79


المصريين ما بينسوش طعم الحرية .. المصريين بيحبوا بلدهم بجد


من أول الفراعنة اللي ما رضيوش بالظلم أبداً .. لحد النهاردة


متستناش لحد ما إبنك ييجي بعد عشرين سنة يقولك كان عندك فرصة تخلوا البلد أحسن


تدونا حياة أحسن .. ترفعوا عننا الذل والظلم .. وتوفرولنا عيشة بجد تليق بالعظم المصري الفرعوني القبطي العربي اللي ما يعرفش غير طعم الحرية


متقولش ساعتها مش عارف


انزل إيدك ف إيد كل المصريين


يوم 6 إبريل .. هنغير الدستور وهنعمل طريق


طريق ليّا وليك ولابني ولابنك ولأجيال كتيرة جاية تفتكرنا بالخير وتقول ماتوا وسابونا في حرية !


من حقنا نحلم ونحاول ونجرب .. وهنثبت .. إن مجاش جيل زينا ف تاريخ مصر


لأننا بجد ولاد مصر !


شاركونا يوم 6 إبريل .. يوم المجد المصري .. والنهضة الحقيقية




تحيــا مصر حــرة مستقلة .. عاشت أمي وأمك مصر


يسقط .. يسقط .. حكم العسكر


يوم 6 إبريل .. الساعة 12 الظهر قدام مجلس الشعب


متنساش .. مصر أمانة في إيدينا كلنا



Read Full Post »

Older Posts »