Feeds:
Posts
Comments

Archive for the ‘معاً للتغيير ..’ Category

كتب  أحمد بدوي ..


لو خمسة تلاف واحد بس نزلوا الشارع يوم 6 أبريل الحكومة مش حتقدر تمنعهم
مش حتقدر تخبيهم عن الاعلام و جرايدها الصفرا مش حتعرف تتجاهلهم
مش حتقدر تمسح من عقولهم العطش للحرية و الديمقراطية و الكرامة الانسانية
المسألة مش مسألة أسعار تنخفض كام يوم و ينضحك علينا تانى …
المسألة أن المصريين لازم يتحركوا عشان مصر تبقى حرة و ترجع أم الدنيا تانى
دى مش كدبة أبريل المرة دى …

تجمع الشعب المصرى و الشباب المصرى مش هين و مش سهل و مش حيعدى بسهولة
ممكن يحبسوا مائة ولا متين … بس مش حيقدروا يحبسوا ألف ولا ألفين ولا عشرة تلاف
يا مصر جه الوقت اللى تقومى فيه من النوم ……
الناس يمكن حيقوموا عشان الأسعار بس مش حيقفوا عندها و حيطالبوا بأكتر و أكتر لحد ما العصابة كلها تخاف و تهرب و ترجع بلدنا لينا
الاعتصام مش فى البيوت ولا على النت …
لازم نشوف بعض و نمسك ايدين بعض و نساعد بعض و نسند بعض ..
. لازم كلنا نقف مع بعض ضد حاكم مستبد غشيم مش بيعامل شعبه غير بالارهاب و الكدب
لازم كلنا نبقى عقول و ايادى و ارادة متجمعة فى سبيل الحرية
لازم تعرف العصابة ان المصريين مش عبيد ولا أتباع و ان لكل ظالم نهاية بقى
فوقى يا مصر و اوعى تنامى تانى أبدا … جه وقت الحساب يا أغاوات
شاركوا فى الاضراب عشان مستقبلنا … عشان حريتنا … عشان مصرنا

28 مارس 2008

……

أحمد بدوي . أتشرف بمتابعتي له .. ، وتأكيداً له قول مولانا زين العابدين فؤاد

مهما يزيد الفجر بالسجانة مين اللي يقدر ساعة يحبس مصر ..

Read Full Post »


حالة من التوتر المشوب بالقلق والحذر .. رغبة في التراجع عن العمل العام والخدمة الوطنية !



حالة إحباط وخوف وهلع .. تجتاح كل شباب الناشطين ..



مش ده اللي انتوا كنتم عاوزينه ..

..

.

مساكين


محصلش ومش هيحصل ..


فاكرين فعلاً .. لما ترهبوا واحد أو اتنين ، أو تحاولوا تخوفوهم حتى .. ” بغض النظر عن إن قلوبهم صخر لأن ده طبع ولاد مصر ” الباقي هيتراجع وينام في بيته ..


على فكرة إحنا نفس الناس اللي كانوا موجودين على كوبري عباس سنة 1946 وبيتضرب عليهم رصاص حيّ ..


انتوا متعرفوش عبدالحكم الجراحي أكيد .. أكيد مش عارفينه .. عشان متخيلين إن شباب مصر ممكن يخاف ..


طيب اديني عقلك كده .. متخيل إننا هنقول .. طب واحنا هنقدر نعمل إيه  لما يلمونا واحد واحد.. لأ نعمل كتير .. خطوة على طريق الحرية .. ممهدة الطريق للأحرار اللي جايين بعدنا .. بعرق ودم

المصري روح وقلب قبل ما يكون جسد فاني .. تسجن الجسد والروح بتسجن السجان


نسيتوا أمل دنقل الله يرحمه بيقول إيه .. ” أو يمكن متعرفوش ” ..

“وغدًا..

سوف يولد من يلبس الدرع كاملةً،

يوقد النار شاملةً،

يطلب الثأرَ،

يستولد الحقَّ، من أَضْلُع المستحيل .. “

غداً جاي ابني لو منجحتش ” بعيد الشر عننا  ” يكمل على خطاويّا


مش هنيأس .. ومعندناش استعداد نرضى بأمان مزيف ..  ومعندناش مانع نبقى طوبة ف بيت الحرية الكبير ” مصر ” ..


وهنفضل شوكة في حلق كل فاسد ومستبد ..


يسقط يسقط حكم العسكر ..

* تدوينة مهداة إلى مها الخضراوي ..

Read Full Post »


ما أظنش في وقت أنسب من ده لاننا نعمل حاجة بجد


من غير خوف .. من غير قلق


جاتلنا زي ما جت سنة 19 وخرج المصريين يرفعوا العلم


زي ما جت سنة 35 و 46 وانتفض الشباب و غنينا لعبد الحكيم الجراحي


زي ما صرخوا سنة 68 و 69 و 72 وغنالهم أمل دنقل


وانتصرنا سنة 73


وخرج المصريين ينادوا بالديمقراطية سنة 77 و 78 و 79


المصريين ما بينسوش طعم الحرية .. المصريين بيحبوا بلدهم بجد


من أول الفراعنة اللي ما رضيوش بالظلم أبداً .. لحد النهاردة


متستناش لحد ما إبنك ييجي بعد عشرين سنة يقولك كان عندك فرصة تخلوا البلد أحسن


تدونا حياة أحسن .. ترفعوا عننا الذل والظلم .. وتوفرولنا عيشة بجد تليق بالعظم المصري الفرعوني القبطي العربي اللي ما يعرفش غير طعم الحرية


متقولش ساعتها مش عارف


انزل إيدك ف إيد كل المصريين


يوم 6 إبريل .. هنغير الدستور وهنعمل طريق


طريق ليّا وليك ولابني ولابنك ولأجيال كتيرة جاية تفتكرنا بالخير وتقول ماتوا وسابونا في حرية !


من حقنا نحلم ونحاول ونجرب .. وهنثبت .. إن مجاش جيل زينا ف تاريخ مصر


لأننا بجد ولاد مصر !


شاركونا يوم 6 إبريل .. يوم المجد المصري .. والنهضة الحقيقية




تحيــا مصر حــرة مستقلة .. عاشت أمي وأمك مصر


يسقط .. يسقط .. حكم العسكر


يوم 6 إبريل .. الساعة 12 الظهر قدام مجلس الشعب


متنساش .. مصر أمانة في إيدينا كلنا



Read Full Post »


عندما تجد فيديو على الفيس بوك .. فتذهب لتفتحه .. لتجد أنه أغنية ثورية جميلة تحبها لليساريَّين الشيخ لإمام وفؤاد نجم .. فوراً يمتلكك شعور بالتقدير تجاه الذي رفع الفيديو .. تذهب تلقائياً لصفحته .. لتجده يتهكم على طبقة من البروليتاريا .. بنكات ليس لها لون أو طعم !

والأدهى أنه يقول أنه يساري

حقاً نعيش في جو من الغباء المقنع بثقافة سياسية مفتعلة كصور بوب مارلي و تشي وحتى هتلر !! … “مع أني دائما أنكرت ذلك ”

يــا رب تفرجها بقى !

Read Full Post »

متكسلش وروح اتأكد من تسجيل اسمك و استلم البطاقة الانتخابية من قسم الشرطة التابع ليه ,,بس يكون معاك البطاقة الشخصية و شهادة الميلاد عشان يتأكد من عنوانك , .. و اللي اسمه مش متسجل لازم يروح قبل 31 يناير , يعني فاضل 4 أيام فقط .. بينا يا مصر . ♥

مشوارك للبطاقة


الموضوع بسيط .. للشباب مواليد بين 82 و 92 أسماؤهم مسجلة تلقائياً .. بس تروح آخد معاك بطاقتك الشخصية ، وتكون معاك شهادة ميلادك القديمة .. بس عشان يتأكد من عنوان الميلاد .. ويطلع اسمك من السجلات .. ويدوب عشر دقايق وتستلم البطاقة وانتا واقف .. لو مش لقيتها تكون آخد معاك صورة للبطاقة .. هيديك استمارة تملاها .. وتدبس فيها البطاقة .. هيديك مسلسل .. تاخده وتجيله بعدها بشهرين تقريباً تستلم بطاقتك .. الموضوع بتاع اللإستمارة برده .. للناس اللي مش في مرحلة القيد التلقائي ..


الموضوع مش هياخد وقت كبير .. بالكتير على أسوأ الظروف بالمشوار والتاكسي .. تقريبا 20 دقيقة بالظبط .. اعملها واتوكل على الله … متديش لحد فرصة يسرق صوتك ..


حصل معايا


كنت واقف هناك .. 3 سيدات أميات .. جم وأخدوا الاسستمارات وصوروا بطايقهم وخلوا الموظفين هناك يكتبولهم .. عشان يطلعوا البطايق الانتخابية .. حد عرف همّا طلعوها ليه .. أكيد مش عشان يأيدوا حقوق الأقليات أكيد .. ولا عشان يحاسبوا الوزرا ” من الوزر يعني ” الفاسدين  .. أكيد لأ .. ! الناس دي غلبانة . .

واللي هيديها أكتر هتديله صوتها .. طيب نعمل إيه .. !؟ أكيد الشباب الواعي المتعلم لما يهمل دوره ويطنش .. أكيد الناس اللي مش لاقية دي .. اللي بيستغلوهم .. هيستمروا في مصادرة حريتنا ورغباتنا .. وكرامتنا  ..


يعني بعد كل ده .. والنبي اللي يكسل يعملها .. ويقعد في البيت .. يا ريت بس ما يرميش كلمة على مصر .. عشان هوّا كده معملش حاجة يلوم بيها على مصر ..  مــش فــاضل وقت ..


مصــر محتــاجــة ولادهـــا .. واللي بقدر يعمل حاجــة ميتأخرش ..


مصــر بتــاعتنــا كلــنا .. بتـــاعت ولادهـــا ..

Read Full Post »



اسمع .. اسمع يارضا .. كل شي عم يغلى ويزيد

امبارح كنّا عالحديدة وهلأ صرنا عالحديد

زيـــاد .. و جوزيف

Read Full Post »


حزر فزر شغل مخك .. شوف مين فينا بيسرق بين !

احنا السنة واحنا الفرض

واحنا الناس بالطول والعرض !

الله يرحمك يا شيخ إمــام

Read Full Post »

Older Posts »